ՀԲԸՄ հայկական վիրտուալ համալսարանը (ՀՎՀ) տոնում է հայկական ավանդույթներն ու տոնական մշակույթը՝ կազմակերպելով հետաքրքիր միջոցառումներ, վիրտուալ շրջայցեր էլեկտրոնային գրքերի և բազմաբնույթ մշակութային նախաձեռնությունների միջոցով։ Հայկական սիրված տոները միասին նշելով՝ աշխարհի տարբեր երկրներում ապրող ուսանողները կարող են ավելի ամրապնդել իրենց կապը հայկական ժառանգության հետ։

Փետրվարը հարուստ է հայկական տոներով և ավանդույթներով, որոնք լեցուն են հույսով, սիրով և հոգևոր ջերմությամբ: 
 

Ստորև ներկայացված են 2026 թվականի փետրվարյան տոները։

Սուրբ Սարգսի տոն (հունվարի 31)
 

Այս տարի Սուրբ Սարգսի տոնը նշվեց ավելի վաղ՝ հունվարի 31-ին: Սակայն այն կարող է նշվել հունվարի 18-ից փետրվարի 25-ն ընկած ցանկացած շաբաթ օրը՝ կախված Զատկի տոնի ամսաթվից։ Սուրբ Սարգիսը երիտասարդության, սիրո և քաջության հովանավորն է։ Հայ ժողովրդի կողմից առանձնահատուկ սիրված այս տոնը խորհրդանշում է հույսը, հավատը և աստվածային օրհնությունների սպասումը։

Սուրբ Վարդանանց տոն (փետրվարի 12)
 

Սուրբ Վարդանանց տոնը 2026 թվականին նշվեց փետրվարի 12-ին։ Այն նվիրված է 451 թվականի Ավարայրի ճակատամարտում հայրենիքի և հավատքի պաշտպանության համար նահատակված հայոց սպարապետ Վարդան Մամիկոնյանի և նրա զինակիցների հիշատակին։

Տյառնընդառաջ (փետրվարի 14)
 

Տյառնընդառաջը, որը նշվում է փետրվարի 14-ին, նվիրված է Հիսուս Քրիստոսի՝ Տաճար ընծայման հիշատակին։ Նախաքրիստոնեական ծագում ունեցող այս տոնը խորհրդանշում է լույսը, օրհնությունը և հոգևոր ջերմությունը։

Բարեկենդան (փետրվարի 15)
 

2026 թվականին փետրվարի 15-ին նշվող Բարեկենդանը ուրախությամբ լեցուն տոն է, որը նախորդում է Մեծ Պահքին։ Այն ավանդաբար ուղեկցվում է խրախճանքով, երգով, պարով և տոնակատարություններով։ Բարեկենդանը առատության, բարեկեցության և ուրախության խորհրդանիշն է:

Սուրբ Սարգսի, Տյառնընդառաջի և Բարեկենդանի տոնակատարություններին նվիրված առցանց միջոցառումը կարող եք դիտել այստեղ։

Հայկական տոների և ավանդույթների մասին առավել մանրամասն իմանալու համար կարող եք ներբեռնել ՀԲԸՄ-ի Armenian Holidays & Traditions հավելվածը։