Ճատրակի համահայկական 5-րդ ճամբար-մրցաշարքը ամփոփեց իր յոբելենական մրցաշարքը Նոյեմբեր 2-ին, առցանց հանդիսաւոր արարողութեամբ։ Ճամբար-մրցաշարքը տեղի ունեցաւ Հոկտեմբեր 6-31։ Առցանց մրցաշարքին նախորդեց երկշաբաթեայ ճամբար, որուն ընթացքին մասնակիցները հետեւեցան մասնագիտական տեսադասերուն, խաղերու վերլուծութեան, առաւել՝ Հայաստանի առաջատար ճատրակորդներու մասնակցութեամբ խաղերուն միանալու առիթն ունեցան:
ՀԲԸՄ Հայկական Համացանցային Համալսարանի (ՀՀՀ) եւ Հայաստանի ճատրակի ակադեմիայի նախաձեռնութեամբ 2020-ին սկիզբ առած Ճատրակի համահայկական ճամբար-մրցաշարքը տարիներու ընթացքին ձեւաւորեց ճատրակասէրներու համայնք մը՝ համախմբելով մօտաւորապէս 1300 հայ պատանի աւելի քանի 50 երկրէ: Այսպիսով ճամբար-մրցաշարքը կրցաւ նպաստել հաղորդակցման, ճատրակի կրթութեան զարգացման եւ տարածման։
2025-ի ճամբար-մրցաշարքի փակման առցանց ձեռնարկին ներկայ էին ՀԲԸՄ-ի փոխնախագահ եւ ՀԲԸՄ ՀՀՀ-ի հիմնադիր նախագահ դոկտ․ Երուանդ Զօրեան, Հայաստանի ճատրակի ակադեմիայի հիմնադիր նախագահ, ՖԻԴԵ-ի «Ճատրակը կրթութեան մէջ» յանձնաժողովի նախագահ ճատրակորդ Սմբատ Լպուտեան, Զուիցերիոյ ճատրակի ֆետերացիայի նախագահ, ՖԻԴԵ-ի սոցիալական յանձնաժողովի նախագահ Անտրէ Վէոկթլին, աշխարհահռչակ ճատրակորդ Արթուր Եուսուփով, ճատրակի ախոյեաններ, ճատրակորդներ եւ մրցանքի մասնակիցներ։
ՀԲԸՄ փոխնախագահ եւ ՀԲԸՄ ՀՀՀ-ի հիմնադիր նախագահ դոկտ․ Երուանդ Զօրեան ողջոյնի խօսքին մէջ նշեց, որ զարգացած եւ բանիմաց երիտասարդներ պատրաստելը միշտ եղած է ՀԲԸՄ-ի գործունէութեան հիմնական նպատակը: Ան ըսաւ. «Այսպիսի նախաձեռնութիւններու նպատակն է ոչ թէ միայն կրթութիւն տալ եւ ճատրակին առնչուող նորութիւններ ներկայացնել, այլ՝ իրարու հետ կապ հաստատելու եւ հաղորդակցելու հնարաւորութիւն ընձեռել»:
Հայաստանի ճատրակի ակադեմիայի հիմնադիր նախագահ, ճատրակորդ Սմբատ Լպուտեան նշեց. «Ուրախ եմ, որ այս հինգ տարուան ընթացքին ՀՀՀ-ը եւ Հայաստանի ճատրակի ակադեմիան ունեցած են իրենց ներդրումը մեր համայնքներուն եւ ճատրակ խաղցող պատանիներուն օգտակար ըլլալու աշխատանքին մէջ»։
Ճատրակի համահայկական 5-րդ ճամբար-մրցաշարքը համախմբեց 8-18 տարեկան 76 հայ պատանի՝ 19 երկրէ։ Մասնակիցները մրցակցեցան 3 պատուաւոր տեղերու համար։
Մրցանակակիրներու անունները յայտարարուեցաւ փակման արարողութեան ընթացքին: Այսպէս.
- առաջին մրցանակակիր՝ Շահան Մովսիսեան Սայիտ, 14 տարեկան, Սէուտական Արաբիա
- երկրորդ մրցանակակիր՝ Ալէն Աւագեան, 15 տարեկան, Հայաստան
- երրորդ մրցանակակիր՝ Սաղաթէլ Թադէոսեան, 11 տարեկան, Հայաստան
Լաւագոյն աղջիկ մասնակից մրցանակին արժանացաւ Հայաստանէն Սիրվարդ Դաւթեան, 9 տարեկան, մինչեւ 10 տարեկան լաւագոյն մասնակիցի մրցանակը շահեցաւ Հայաստանէն, 9 տարեկան Սոֆիա Բաղրամեանը:
Բոլոր յաղթողները ստացան վկայականներ եւ մրցանակներ։
Փակման արարողութեան հիւրաբար ներկայ ճատրակորդ Արթուր Եուսուփով ըսաւ. «Այս աշխատնքին յաջողութիւն կը մաղթեմ: Այսպիսի գործունէութեամբ կը նպաստէք ոչ թէ միայն հայկական ճատրակի, այլ նաեւ աշխարհի ճատրակի զարգացման»:
Ձեռնարկի ընթացքին ներկաները վայելեցին յատուկ խաղ մը, որ տեղի ունեցաւ կանանց միջազգային վարպետ, Հայաստանի կանանց քառակի ախոյեան Սուսաննա Գաբոյեանի եւ կանանց միջազգային վարպետ, ճատրակորդ Աննա Սարգսեանի միջեւ:
Փակման արարողութեան աւարտին շատեր յատուկ խաղի մասնակցեցան եւ մրցանակներ ստացան։
Ճատրակի համահայկական առցանց ճամբար-մրցաշարքի 5-ամեայ գործունէութեան կրնաք ծանօթանալ այստեղ սեղմելով:
Ճատրակի համահայկական 5-րդ ճամբար-մրցաշարքի փակման արարողութեան տեսագրութիւնը կրնաք տեսնել, այստեղ։
