login
Յօդուածներ
ՀԲԸՄ-ի Հայկական Համացանցային Համալսարանի նորարարական աշխատանքը եւ ծրագիրները ներկայացուեցան EdTech 2022 կրթական համաժողովին 07/12/2022

Յուլիս 4-ին տեղի ունեցաւ «ԿԱԶԱ» զուիցերական մարդասիրական հիմնադրամի եւ Հայաստանի ֆրանսական համալսարանի կողմէ կազմակերպուած «Արհեստական բանականութիւն. կրթական հարցերն ու ճարտարագիտութեան պատասխանները» խորագիրով համաժողովը: Համաժողովին քննարկուեցան կրթական ոլորտի առկայ մարտահրաւէրները եւ ճարտարագիտութեան ոլորտներու երկխօսութեան զարգացման  առաջնահերթութիւնները։ 


Կրթա-ճարտարագիտական կառոյցներու եւ սթարթափերու (նոր աշխատանք -ծրագիրներու մեկնարկներու) ներկայացումի նիստին  ՀԲԸՄ-ի Հայկական Համացանցային Համալսարանի Համագործակցութեան  եւ գործառնական ղեկավար Արփինէ Թաւաքալեանը ներկայացուց ՀՀՀ-ի գործունէութիւնն ու առաքելութիւնը: Ան ներկայացուց նաեւ ՀՀՀ-ի ունեցած փորձառութիւնը, նշելով մարտահրաւէրներուն արձագանգելու եւ ճարտարագիտական լուծումներ կիրառելու կարողութիւնը։ Ապա անդրադարձաւ Հայաստանի եւ Արցախի աւագ դպրոցի աշակերտներուն համար նախատեսուած «Արհեստական բանականութիւն» դասընթացքին։


Ելոյթէն ետք ներկաները հետաքրքրական հարցումներ հարցուցին: Տեղի ունեցաւ քննարկումներու եւ կարծիքներու փոխանակում, արծարծուեցան գործընթացի հնարաւորութիւններն ու կրթութեան եւ արհեստական բանականութեան միջեւ գործակցութեան զարգացման հեռանկարները: Ներկաներուն մէջ մեծ ոգեւորութիւն առաջացաւ ՀՀՀ-ի ծրագիրներուն եւ  հայագիտական նիւթերուն առցանց դասաւանդման ոլորտէն ներս ՀՀՀ-ի կիրառած ճկուն մօտեցման հանդէպ: 


Համաժողովին ներկայ էին նաեւ ՀՀՀ-ի զարգացման բաժինի աւագ ղեկավար Արթիւր Աւագեանն ու համագործակցութեան եւ հաղորդակցութեան մասնագէտ Նորա Գրիգորեանը։


Ապրիլ 22-էն ի վեր ՀԲԸՄ-ի Հայկական Համացանցային Համալսարանը կ'ապահովէ եւ կը կազմակերպէ «Արհեստական բանականութիւն» դասընթացքի առաջին հանգրուանի ուսուցման գործընթացը՝ ել. ուսուցման հիպրիթ ծրագիրով։


Սիլիքոն հովիտի ՀԲԸՄ-ի մասնաճիւղի,  Սինոփսիս Արմենիայի եւ Տեղեկատուական ու հաղորդակցութեան ճարտարագիտութեան գործատուներու միութեան կողմէ նախաձեռնուած ու մշակուած դասընթացքը տեղի կ'ունենայ Սինոփսիս հիմնադրամի հովանաւորութեամբ։


Մանրամասն՝ https://www.avc-agbu.org/why/news/articles/interactive-courses-on-artificial-intelligence-for-high-school-students