Թօփալեան դպրոցի աշակերտները՝ ՀՀՀ-ի մասին
10/10/2022
ՀԲԸՄ-ի Հայկական համացանցային համալսարանի եւ Ժընեւի Թօփալեան վարժարանի միջեւ հաստատուած համագործակցութեան շնորհիւ, 2019-էն ի վեր հայկական առցանց կրթութիւնը հասանելի է դպրոցի աշակերտներուն՝ հիպրիթ ծրագիրի միջոցով:
Երկարատեւ արդիւնաւէտ համագործակցութիւնը յատկանշական դարձաւ 2022-ին: 10 տարեկան Ալեք Ընքսզեանն ու Ցոլակ Տիօստատօ տէ Գասօնարդէն դպրոցի շրջանաւարտներէն են: Անոնք յաջողութեամբ ամբողջացուցին ՀՀՀ-ի արեւմտահայերէնի դասընթացքին առաջին մակարդակը: Դպրոցի շրջանաւարտներու աւարտական հանդիսութիւնը տեղի ունեցաւ Յունիս 8-ին: Հանդիսութեան ընթացքին Ալեքն ու Ցոլակը ստացան թէ՛ Թօփալեան դպրոցի, թէ՛ ՀԲԸՄ ՀՀՀ-ի կողմէ տրամադրուած վկայականները:
Ցոլակը կ'ըսէ. «Մեծ հաճոյքով 7 տարի յաճախեցի Թօփալեան վարժարանը: Այսօր ես շնորհակալ եմ դպրոցին եւ Հայկական Համացանցային Համալսարանին, քանի որ այս տարիներու ընթացքին ունեցայ հայ ընկերներ, սորվեցայ հայոց աբուբենը, սորվեցայ հայերէն կարդալ, գրել եւ երգել»:
Իսկ Ալեքը դասընկերոջ խօսքը շարունակելով կ'ըսէ. «Ես ալ սիրով եկայ դպրոց. ՀՀՀ-ի ծրագիրին շնորհիւ սորվեցայ հայոց լեզուն, ծանօթացայ հայկական մշակոյթին. շատ շնորհակալ եմ»:
Թօփալեան դպրոցի ուսուցչուհի Մարալ Վուրին կը հաստատէ, որ երկուքն ալ աշխատասէր աշակերտներ եղած են եւ արդէն հայերէն լաւ կը խօսին: Հայերէնի դասընթացքները կազմակերպուած են դպրոցի ուսուցչուհիին եւ ՀՀՀ-ի արեւմտահայերէնի հարցերը համակարգող, հեռավար ուսուցչուհի Զեփիւռ Խպլիկեանի անմիջական մասնակցութեամբ եւ աջակցութեամբ: Առցանց դասերուն զուգահեռ աշակերտները մասնակցած են Կաղանդի, Բարեկենդանի, Յարութեան տօնի, Հայաստանի անկախութեան, Թարգմանչաց տօնի եւ Մծբինի Սուրբ Յակոբ հայրապետի հիշատակի օրուան նուիրուած ընկերային ու մշակութային առցանց ձեռնարկներուն:
Մայրենի լեզուի միջազգային օրուան առթիւ կազմակերպուած ձեռնարկին, ՀՀՀ-ը տարբեր եկիրներէ հիպրիթ կրթութեան ծրագիրին միացած դպրոցները համախմբեց. այդ ձեռնարկին միացած էր նաեւ Թօփալեան վարժարանը: Աշակերտները լսելով Վահան Թէքէեանի «Տաղ հայերէն լեզուի» բանաստեղծութիւնը, անկէ ներշնչուած, գեղեցիկ պատկերներ կը գծեն:
Դիտել տեսանիւթ:
Թօփալեան վարժարանը հիմնուած է 1994-ին, մեծ հայրենասէր եւ բարերար Յակոբ Թօփալեանի ջանքերով: Անոր նպատակն էր զարկ տալ հայկական մշակոյթին եւ ազգային ինքութեան պահպանման՝ սփիւռքի մէջ:
