ԵՐԵՎԱՆ – Շախմատի համահայկական 5-րդ ճամբար-մրցաշարը ամփոփեց իր հոբելյանական մրցաշրջանը նոյեմբերի 2-ին՝ առցանց հանդիսավոր արարողությամբ։ Ճամբար-մրցաշարն անցկացվեց առցանց հոկտեմբերի 6-ից 31-ը։ Առցանց մրցաշարին նախորդեց երկշաբաթյա ճամբարը, որի ընթացքում կազմակերպվեցին վարպետաց տեսադասեր, շախմատային խաղերի վերլուծություն և միաժամանակյա խաղեր Հայաստանի առաջատար գրոսմայստերների մասնակցությամբ:
Միջոցառմանը ներկա էին ՀԲԸՄ փոխնախագահ, ՀԲԸՄ հայկական վիրտուալ համալսարանի (ՀՎՀ) հիմնադիր նախագահ դոկտ․ Երվանդ Զորյանը, Հայաստանի շախմատի ակադեմիայի հիմնադիր նախագահ, ՖԻԴԵ-ի «Շախմատը կրթության մեջ» հանձնաժողովի նախագահ գրոսմայստեր Սմբատ Լպուտյանը, Շվեյցարիայի շախմատի ֆեդերացիայի նախագահ, ՖԻԴԵ-ի սոցիալական հանձնաժողովի նախագահ Անդրե Վյոգտլինը, աշխարհահռչակ գրոսմայստեր Արթուր Յուսուպովը, հայազգի շախմատի չեմպիոններ և գրոսմայստերներ, ինչպես նաև մրցաշարի մասնակիցները։
Շախմատի համահայկական 5-րդ ճամբար-մրցաշարը համախմբեց 8-18 տարեկան 76 հայ պատանիների 19 երկրից։ Շախմատի մրցաշարն անցկացվեց արագ շախմատի շվեյցարական մրցակարգով։ Մասնակիցները մրցեցին 3 պատվավոր տեղերի համար։
Մրցաշարի հաղթողների անունները հայտարարվեցին փակման արարողության ընթացքում․
- առաջին մրցանակակիր՝ Շահան Մովսիսյան Սայիդ, 14 տ., Սաուդյան Արաբիա
- երկրորդ մրցանակակիր՝ Ալեն Ավագյան, 15 տ․, Հայաստան
- երրորդ մրցանակակիր՝ Սաղաթել Թադևոսյան, 11 տ․, Հայաստան
Լավագույն աղջիկ մասնակից մրցանակին արժանացավ Հայաստանից Սիրվարդ Դավթյանը , 9 տ., իսկ մինչև 10 տարեկան լավագույն մասնակից մրցանակը ստացավ Հայաստանից 9-ամյա Սոֆիա Բաղրամյանը:
Բոլոր հաղթողները ստացան վկայականներ և մրցանակներ։
Իր բացման խոսքում, ՀԲԸՄ փոխնախագահ և ՀԲԸՄ ՀՎՀ-ի հիմնադիր նախագահ դոկտ․ Երվանդ Զորյանը նշեց, որ կրթությունը և զարգացած, բանիմաց ու մրցունակ երիտասարդների պատրաստումը միշտ եղել և մնում է ՀԲԸՄ-ի գործունեության կարևորագույն ուղղություններից մեկը: Այդ նպատակին է ծառայում նաև արդեն 5-րդ տարին անցկացվող Շախմատի համահայկական առցանց ճամբար-մրցաշարը, և դրա հիման վրա ստեղծված ՀՎՀ-ի շախմատի համահայկական համայնքը, որը միավորում է 1300 շախմատասերների ավելի քան 50 երկրից: «Այդ նախաձեռնությունների նպատակն է անհատների համար ստեղծել ոչ միայն կրթվելու, մասնագետներից սովորելու և շախմատային նորություններ իմանալու, այլև միմյանց հետ կապ հաստատելու և հաղորդակցվելու հնարավորություններ»,-ասաց դոկտ․ Զորյանը։
Ողջունելով ճամբար-մրցաշարի բոլոր մասնակիցներին և հաղթողներին՝ Հայաստանի Շախմատի ակադեմիայի նախագահ, գրոսմայստեր Սմբատ Լպուտյանը նշեց. «Ուրախ եմ, որ այս հինգ տարիների ընթացքում ՀՎՀ-ն ու Հայաստանի շախմատի ակադեմիան իրենց ներդրումն են ունենում մեր համայնքներին և մեր պատանի շախմատիստներին, գալիք սերնդին օգտակար լինելու գործում»։
«Մաղթում եմ այս միջոցառմանը մեծ հաջողություն։ Կարծում եմ՝ դուք մեծ ներդրում եք կատարում ոչ միայն հայկական շախմատի, այլև աշխարհի շախմատի զարգացման գործում», -ասաց պատվավոր հյուր Արթուր Յուսուպովը:
Միջոցառման կազմակերպիչները մասնակիցների համար պատրաստել էին անակնկալ՝ բլից խաղ հայ շախմատիստուհի, կանանց միջազգային վարպետ, Հայաստանի կանանց քառակի չեմպիոն Սուսաննա Գաբոյանի և կանանց միջազգային վարպետ, գրոսմայստեր Աննա Սարգսյանի միջև:
Փակման արարողության վերջում մասնակիցները հնարավորություն ունեցան մասնակցել խաղ-վիկտորինայի՝ շահելով մրցանակներ։
ՀԲԸՄ հայկական վիրտուալ համալսարանի (ՀՎՀ) և Հայաստանի շախմատի ակադեմիայի նախաձեռնությամբ 2020թ․ մեկնարկած Շախմատի համահայկական ճամբար-մրցաշարը հինգերորդ տարին անընդմեջ համախմբեց շախմատասեր հայ պատանիներին ամբողջ աշխարհից՝ նպաստելով շախմատ խաղի կրթության զարգացմանը և տարածմանը՝ ընդլայնելով աշխարհասփյուռ այս համայնքի մասնակիցների թիվը և աշխարհագրությունը։
Դիտեք Շախմատի համահայկական առցանց ճամբար-մրցաշարի մասին պատմող տեսանյութն այստեղ։
Դիտեք Շախմատի համահայկական 5-րդ ճամբար-մրցաշարի փակման արարողության տեսագրությունն այստեղ։
ՀԲԸՄ հայկական վիրտուալ համալսարանի մասին
ՀԲԸՄ hայկական վիրտուալ համալսարանը (ՀՎՀ) 2009 թվականին հիմնադրված էլեկտրոնային ուսուցման առաջատար հայագիտական հաստատություն է, որը նպաստում է հայ ինքնության պահպանմանն ու զարգացմանը նոր կրթական տեխնոլոգիաների միջոցով: ՀՎՀ-ի մուլտիմեդիա առցանց դասընթացները, հավատարմագրված կրթական ծրագրերը, ինտերակտիվ էլեկտրոնային գրքերը և վիրտուալ
